ਹਰਿਦੁਆਰ- ਉੱਤਰਾਖੰਡ ਪ੍ਰਦੂਸ਼ਣ ਕੰਟਰੋਲ ਬੋਰਡ ਨੇ ਬੁੱਧਵਾਰ ਨੂੰ ਕਿਹਾ ਕਿ ਹਰਿਦੁਆਰ 'ਚ ਗੰਗਾ ਨਦੀ ਦਾ ਪਾਣੀ 'ਬੀ' ਸ਼੍ਰੇਣੀ 'ਚ ਪਾਇਆ ਗਿਆ, ਜਿਸ ਕਾਰਨ ਇਹ ਪੀਣ ਲਈ ਅਸੁਰੱਖਿਅਤ ਪਰ ਨਹਾਉਣ ਲਈ ਢੁਕਵਾਂ ਹੈ। ਉੱਤਰਾਖੰਡ ਪ੍ਰਦੂਸ਼ਣ ਕੰਟਰੋਲ ਬੋਰਡ ਹਰ ਮਹੀਨੇ ਉੱਤਰ ਪ੍ਰਦੇਸ਼ ਦੀ ਸਰਹੱਦ ਦੇ ਨਾਲ ਹਰਿਦੁਆਰ ਦੇ ਆਲੇ-ਦੁਆਲੇ ਅੱਠ ਥਾਵਾਂ 'ਤੇ ਗੰਗਾ ਦੇ ਪਾਣੀ ਦੀ ਜਾਂਚ ਕਰਦਾ ਹੈ। ਤਾਜ਼ਾ ਟੈਸਟਿੰਗ ਦੌਰਾਨ ਨਵੰਬਰ ਮਹੀਨੇ ਲਈ ਗੰਗਾ ਨਦੀ ਦਾ ਪਾਣੀ ‘ਬੀ’ ਸ਼੍ਰੇਣੀ ਦਾ ਪਾਇਆ ਗਿਆ। ਨਦੀ ਦੇ ਪਾਣੀ ਨੂੰ 5 ਸ਼੍ਰੇਣੀਆਂ ਵਿਚ ਵੰਡਿਆ ਗਿਆ ਹੈ, ਜਿਸ ਵਿਚ 'ਏ' ਸਭ ਤੋਂ ਘੱਟ ਜ਼ਹਿਰੀਲਾ ਹੈ, ਜਿਸਦਾ ਮਤਲਬ ਹੈ ਕਿ ਪਾਣੀ ਨੂੰ ਰੋਗਾਣੂ ਮੁਕਤ ਕਰਨ ਤੋਂ ਬਾਅਦ ਪੀਣ ਦੇ ਸਰੋਤ ਵਜੋਂ ਵਰਤਿਆ ਜਾ ਸਕਦਾ ਹੈ ਅਤੇ 'ਈ' ਸਭ ਤੋਂ ਜ਼ਹਿਰੀਲਾ ਹੈ।  ਇਕ ਨਿਊਜ਼ ਏਜੰਸੀ ਨਾਲ ਗੱਲਬਾਤ ਕਰਦਿਆਂ, UKPCB ਦੇ ਖੇਤਰੀ ਅਧਿਕਾਰੀ ਰਾਜੇਂਦਰ ਸਿੰਘ ਨੇ ਕਿਹਾ ਕਿ ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਬੋਰਡ ਨੇ ਪਾਣੀ ਦੀ ਗੁਣਵੱਤਾ ਨੂੰ 5 ਸ਼੍ਰੇਣੀਆਂ ਵਿਚ ਵੰਡਿਆ ਹੈ। ਚਾਰ ਮਾਪਦੰਡਾਂ (pH, ਘੁਲਣ ਵਾਲੀ ਆਕਸੀਜਨ, ਜੈਵਿਕ ਆਕਸੀਜਨ ਅਤੇ ਕੁੱਲ ਕੋਲੀਫਾਰਮ ਬੈਕਟੀਰੀਆ) ਦੇ ਆਧਾਰ 'ਤੇ ਗੰਗਾ ਦੀ ਗੁਣਵੱਤਾ 'ਬੀ' ਸ਼੍ਰੇਣੀ ਵਿਚ ਪਾਈ ਗਈ ਹੈ, ਇਸ ਦਾ ਮਤਲਬ ਹੈ ਕਿ ਗੰਗਾ ਦਾ ਪਾਣੀ ਨਹਾਉਣ ਲਈ ਢੁਕਵਾਂ ਹੈ । ਉਜਵਲ ਪੰਡਿਤ ਸਥਾਨਕ ਪੁਜਾਰੀ ਨੇ ਵੀ ਪਾਣੀ ਵਿਚ ਵੱਧ ਰਹੇ ਪ੍ਰਦੂਸ਼ਣ 'ਤੇ ਚਿੰਤਾ ਪ੍ਰਗਟ ਕੀਤੀ। ਉਨ੍ਹਾਂ ਕਿਹਾ ਕਿ ਮਨੁੱਖੀ ਰਹਿੰਦ-ਖੂੰਹਦ ਕਾਰਨ ਗੰਗਾ ਜਲ ਦੀ ਸ਼ੁੱਧਤਾ ਪ੍ਰਭਾਵਿਤ ਹੁੰਦੀ ਹੈ। ਸਿਰਫ ਗੰਗਾ ਜਲ ਨਾਲ ਇਸ਼ਨਾਨ ਕਰਨ ਨਾਲ ਸਾਡੇ ਸਰੀਰ ਦੀਆਂ ਬੀਮਾਰੀਆਂ ਠੀਕ ਹੋ ਜਾਂਦੀਆਂ ਹਨ। ਕੈਂਸਰ ਵਰਗੀਆਂ ਬੀਮਾਰੀਆਂ ਇਸ ਨਾਲ ਠੀਕ ਹੋ ਜਾਂਦੀਆਂ ਹਨ। ਅਸੀਂ ਦਾਅਵਾ ਕਰਦੇ ਹਾਂ ਕਿ ਜੇਕਰ ਤੁਸੀਂ ਹੁਣ ਗੰਗਾ ਜਲ ਲੈ ਕੇ 10 ਸਾਲ ਬਾਅਦ ਇਸ ਦੀ ਜਾਂਚ ਕਰੋਗੇ ਤਾਂ ਤੁਹਾਨੂੰ ਇਸ ਵਿਚ ਕੋਈ ਵੀ ਗੰਦਗੀ ਨਹੀਂ ਮਿਲੇਗੀ। ਗੰਗਾ ਜਲ ਦੀ ਸ਼ੁੱਧਤਾ ਬਾਰੇ ਜੋ ਕੁਝ ਵੀ ਸਾਹਮਣੇ ਆ ਰਿਹਾ ਹੈ, ਉਹ ਮਨੁੱਖੀ ਰਹਿੰਦ-ਖੂੰਹਦ ਕਾਰਨ ਹੈ ਅਤੇ ਸਾਨੂੰ ਇਸ ਨੂੰ ਬਦਲਣ ਦੀ ਲੋੜ ਹੈ। ਇਸ ਦੌਰਾਨ ਪਿਛਲੇ ਕੁਝ ਸਾਲਾਂ ਤੋਂ ਭਾਰਤ ਦੀਆਂ ਨਦੀਆਂ ਖਾਸ ਕਰਕੇ ਦਿੱਲੀ ਦੀ ਯਮੁਨਾ ਨਦੀ ਵਿਚ ਵੱਧ ਰਿਹਾ ਪ੍ਰਦੂਸ਼ਣ ਗੰਭੀਰ ਚਿੰਤਾ ਦਾ ਕਾਰਨ ਬਣਿਆ ਹੋਇਆ ਹੈ।