ਕੋਚੀ- ਕੇਰਲ ਦੇ ਕੋਚੀ 'ਚ ਐਤਵਾਰ ਨੂੰ ਈਸਾਈ ਭਾਈਚਾਰੇ ਦੀ ਪ੍ਰਾਰਥਨਾ ਸਭਾ 'ਚ ਹੋਏ ਲੜੀਵਾਰ ਧਮਾਕਿਆਂ ਵਿਚ ਹੁਣ ਤੱਕ 3 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ 52 ਹੋਰ ਜ਼ਖ਼ਮੀ ਹੋ ਗਏ। ਕੇਰਲ ਦੀ ਸਿਹਤ ਮੰਤਰੀ ਵੀਨਾ ਜਾਰਜ ਨੇ ਕਿਹਾ ਕਿ ਵੱਖ-ਵੱਖ ਹਸਪਤਾਲਾਂ 'ਚ ਜ਼ਖਮੀ 52 ਲੋਕਾਂ ਵਿਚੋਂ 30 ਦਾ ਅਜੇ ਵੀ ਇਲਾਜ ਚੱਲ ਰਿਹਾ ਹੈ। ਗੰਭੀਰ ਰੂਪ ਨਾਲ ਜ਼ਖ਼ਮੀ 18 ਲੋਕ ICU 'ਚ ਹਨ ਅਤੇ 5 ਦੀ ਹਾਲਤ ਬੇਹੱਦ ਗੰਭੀਰ ਹੈ। 

ਕੋਚੀ ਦੇ ਇਕ ਵਿਅਕਤੀ ਈਸਾਈ ਧਾਰਮਿਕ ਸਭਾ ਵਿਚ ਹੋਏ ਧਮਾਕਿਆਂ ਦੀ ਜ਼ਿੰਮੇਵਾਰੀ ਲੈਂਦੇ ਹੋਏ ਸੋਸ਼ਲ ਮੀਡੀਆ 'ਤੇ ਇਕ ਵੀਡੀਓ ਸੰਦੇਸ਼ ਪੋਸਟ ਕੀਤਾ ਹੈ। ਉਸ ਨੇ ਦਾਅਵਾ ਕੀਤਾ ਕਿ ਧਮਾਕੇ ਇਸ ਲਈ ਕੀਤੇ ਗਏ, ਕਿਉਂਕਿ ਸੰਗਠਨ ਦੀਆਂ ਸਿੱਖਿਆਵਾਂ ਦੇਸ਼ ਲਈ ਸਹੀ ਨਹੀਂ ਹਨ। ਖ਼ੁਦ ਨੂੰ ਈਸਾਈਆਂ ਦੇ ਯਹੋਵਾ ਦੇ ਸਾਕਸ਼ੀ ਸਮੂਹ ਦਾ ਮੈਂਬਰ ਦੱਸਣ ਵਾਲੇ ਉਕਤ ਵਿਅਕਤੀ ਨੇ ਪੁਲਸ ਸਾਹਮਣੇ ਸਰੰਡਰ ਕਰ ਦਿੱਤਾ ਹੈ। 

ਪੁਲਸ ਨੇ ਦੱਸਿਆ ਕਿ ਉਕਤ ਵਿਅਕਤੀ ਨੇ ਕੋਡਕਾਰਾ ਥਾਣੇ 'ਚ ਸਵੇਰੇ ਸਰੰਡਰ ਕੀਤਾ ਅਤੇ ਦਾਅਵਾ ਕੀਤਾ ਕਿ ਉਸ ਨੇ ਹੀ ਧਮਾਕੇ ਨੂੰ ਅੰਜ਼ਾਮ ਦਿੱਤਾ। ਉਕਤ ਵਿਅਕਤੀ ਦਾ ਨਾਂ ਡੋਮੀਨਿਕ ਮਾਰਟਿਨ ਹੈ। ਉਸ ਨੇ ਆਪਣੇ ਦਾਅਵੇ ਦੇ ਸਮਰਥਨ 'ਚ ਸਬੂਤ ਵੀ ਦਿੱਤੇ। ਫ਼ਿਲਹਾਲ ਪੁਲਸ ਇਸ ਦੀ ਜਾਂਚ ਕਰ ਰਹੀ ਹੈ। ਉਕਤ ਵਿਅਕਤੀ ਨੇ ਖ਼ੁਦ ਨੂੰ ਯਹੋਵਾ ਦੇ ਸਾਕਸ਼ੀ ਈਸਾਈ ਧਾਰਮਿਕ ਸਮੂਹ ਦਾ ਅਨੁਯਾਯੀ ਹੋਣ ਦਾ ਵੀ ਦਾਅਵਾ ਕੀਤਾ ਹੈ।